Мақта қозасын дефолианттармен өңдеу, мақтаның бір бұтасында 2-3 немесе 3-4 көсек ашылғанда жүргізілуі қолайлы уақыт болып табылады.Қазақ мақта шаруашылығы ғылыми-зерттеу иниституты ғалымдарының зерттеу жұмыстарының нәтижесі бойынша, Мактаарал-4005 ортаталшықты мақта сортына сынақталған жаңа препараттардың ішінде Авгурон-0,5 л/га және Авгурон-экстра-0,2 л/га мөлшерінде, мақта жапырағының түсуіне және көсектерінің ашылуына жоғары тиімділігін көрсетті. Кейінгі тиімді көрсеткіштері бойынша ұзақ жылдардан бері мақта шаруашылығында Дропп-ультра және Хлорат магния қолданысындағы дефолианттары болып есептеледі, сондай-ақ олар қазір де шаруа қожалықтары мен ұсақ шаруа қожалықтарында қолданып келуде. Дропп-ультра препараты 0,7 л/га мөлшерінде 70,0 пайыз жапырақ түсуін, 21,7 пайыз көсек ашылу көрінісінде, ал Хлорат-магния препараты 12,0 кг/га мөлшерінде 69,1 пайыз жапырақ түсуін және 23,4 пайыз көсек ашылуына ықпалды белсенділігін танытқан. Осы дефолианттар қолдану кезінде қоршаған ортаға және адамдар мен жануарларға кем әсерлі екендігін байқатқан. Дефолианттар мақта өнімінің пісіп-жетілуін тездетіп, ауа-райының ашық та қолайлы қысқа мерзімінде, жинап алуға үлкен мүмкіншілік тудырады.